Os directores do Igape, Javier Aguilera, e da Fundación EOI, Fernando Bayón, asinaron hoxe en Santiago o acordo para fomentar a posta en marcha de novos proxectos empresariais e aumentar as súas posibilidades de éxito. As accións, das que se poderán beneficiar ata 1.500 emprendedores, inclúen formación, asesoramento e aceleración no proceso de activación de novas empresas, e desenvolverase durante os dous próximos anos, contando cun orzamento global de 4,8 millóns de euros. Activaranse centros de emprendemento en Xinzo de Limia, Cabana de Bergantiños, Monforte, Mondoñedo, Ferrol e Celanova promovendo o reequilibrio territorial. O convenio vén reforzar e dar novo pulo á batería de servizos e apoios impulsada pola Xunta ao abeiro da Lei de Emprendemento.

O director do Igape, Javier Aguilera, visitou as instalacións deste innovador espazo lúdico con alternativas de ocio para rapaces e mozos, parellas, ANPAS, centros escolares ou actividades de empresas. Pekexogo Animación conta cun préstamo Igape-Jeremie para a realización dos investimentos nas instalacións e equipamentos. Aguilera salienta que o Igape activou este ano programas de axuda dotados con máis de 30M€ e que acaba de ampliar a dotación para o programa de préstamos Jeremie.

 O director xeral do Igape, Javier Aguilera, participa na xornada técnica “Galicia, un lugar para investir”, organizada conxuntamente con Aegama, que aglutina a unha rede integrada por máis de 1.600 empresas. Salienta o programa Galicia Transmite, coordinado conxuntamente co Goberno do Estado a través da DIGPYME para conectar empresarios e emprendedores nun esforzo centrado en xerar actividade e emprego reforzando o tecido produtivo en Galicia. Destaca que o Igape xa activou este ano programas de axuda dotados con máis de 30 millóns para facilitar os proxectos empresariais, a mellora da competitividade ou a internacionalización das empresas galega.

O director do Igape, Javier Aguilera, visitou as instalacións en Pereiro de Aguiar desta compañía, especializada en deseño, montaxe, comercialización e mantemento de contedores de lixo, tanto soterrados como de superficie. Formato Verde, que monta os seus produtos con pezas fabricadas por provedores galegos, conta con instalacións en Portugal e Almería e exporta a mercados como América Latina ou Arabia Saudí. Aguilera destaca que a Consellería de Economía, Emprego e Industria leva activadas este ano axudas por case 10M€ para facilitar as exportacións das pemes.

Expertos de Alemaña e Países Baixos participan o día 18 en Santiago e o 19 na Coruña no III Taller Marketing Expertise. Os encontros, organizados polo Igape en colaboración coa Cátedra Jean Monet da Universidade da Coruña, contarán con Jürgen Janovsky, experto en xestión da innovación, e P.A. Breddels, desenvolvedor de negocios para empresas de alto contido tecnolóxico.