O conselleiro de Economía, Emprego e Industria, Francisco Conde, reuniuse onte, por videoconferencia, con diferentes entidades financeiras e sociedades de garantía recíproca galegas. Na xuntanza abordaron polo miúdo as medidas de financiamento que o Goberno galego vai activar para inxectar de inmediato liquidez ao tecido empresarial. Esta liña de préstamos permitirá mobilizar no tecido empresarial galego 250 millóns de euros para que as pemes e autónomos poidan cubrir gastos. Outra das iniciativas de apoio que se activa é o aprazamento das cotas de amortización e xuros da liquidación dos préstamos formalizados coa Xunta de Galicia. A través de Xesgalicia, a Xunta engade, tamén, unha terceira liña de 10 millóns de euros para cubrir as necesidades de reestruturación produtiva das empresas galegas que decidan acometer a fabricación de material sanitario necesario para facer fronte ao coronavirus. Ademais, ata o venres 27, os axentes do ecosistema galego de innovación que teñan algunha proposta ou proxecto que poida contribuír á loita contra o COVID-19 poderán presentala á Consellería de Economía, Emprego e Industria a través de Gain. No marco da rolda de contactos que a Xunta vén mantendo estes días cos axentes económicos e sociais galegos, Conde tamén celebrou hoxe unha xuntanza por videoconferencia con representantes da industria forestal.

De conformidade coas medidas preventivas do sector público autonómico adoptadas como consecuencia da evolución do COVID-19, suspéndense os prazos para a tramitación dos procedementos no ámbito do Igape.

Estes prazos reiniciaranse unha vez finalizada a vixencia destas medidas, ou se é o caso, as súas prórrogas.

O director do Igape, Juan Cividanes, informou sobre o novo programa que, cunha dotación inicial dun millón de euros, achega diagnóstico e asesoramento para adaptarse ás novas relacións comerciais co país británico. A iniciativa forma parte dun paquete de accións impulsado pola Consellería de Economía, Emprego e Industria que inclúe un servizo de consultoría cunha oficina en Londres e a Plataforma Brexit Galicia, xa en funcionamento. Máis de 500 empresas galegas venderon os seus produtos ao mercado británico en 2019, por un valor total que supera os 1500 M€.

O director do Igape, Juan Cividanes, participou hoxe no encontro sobre dixitalización e nova industria organizado en Santiago de Compostela en colaboración co Clúster Audiovisual Galego. Convida ás empresas do sector a seguir impulsando a transformación tecnolóxica do tecido produtivo mediante as axudas á dixitalización, os Proxectos 4.0 e o resto de programas impulsados pola Axenda 4.0.

O director do Igape, Juan Cividanes, participou hoxe no acto de inauguración do XXIX Salón do Automóbil e a Motocicleta, que durante os próximos cinco días reunirá en Vigo 65 marcas e unha ducia de expositores da industria auxiliar. Salienta o esforzo conxunto das compañías, clústeres e organizacións empresariais no impulso á innovación, a internacionalización e a formación do capital humano nun sector estratéxico para Galicia.