Vilanova de Arousa (Pontevedra), 23 de xullo de 2019.- O director do Igape, Juan Cividanes, salientou hoxe no Pazo Vista Real de Vilanova de Arousa os servizos e axudas que a Consellería de Economía, Emprego e Industria pon a disposición das novas empresas no peche do coworking do Salnés, onde os 22 emprendedores participantes nesta terceira edición presentaron os seus proxectos empresariais despois de completar o proceso de formación e asesoramento.
Os novos empresarios, que desenvolveron 21 plans de negocio neste espazo de emprendemento, impulsado pola Xunta en colaboración coa Escola de Organización Industrial (EOI), optaron por diferentes sectores de actividade como o benestar e a saúde; o turismo especializado, integral e sostible; a oferta gastronómica baseada en tradicións locais e internacionais; a produción alimentaria artesanal; e servizos gráficos, de lecer e inmobiliarios personalizados.
O coworking do Salnés, que nas dúas edicións anteriores apoiou 44 iniciativas emprendedoras, forma parte da rede creada pola Consellería de Economía, Emprego e Industria, a través do Igape, en colaboración coa EOI. O obxectivo fundamental das aceleradoras, que contan con co-financiamento do Fondo Social Europeo (FSE), é promover o desenvolvemento de proxectos empresariais e a creación de emprego sobre o territorio, incrementando as probabilidades de éxito das iniciativas promovidas polos emprendedores, facilitando a súa posta en marcha e a súa consolidación temperá.
Desde o comezo da súa actividade en 2017 ata a actualidade, dos 65 proxectos impulsados na aceleradora xa están en marcha 28, e está previsto que comecen a funcionar proximamente 11 máis. Ademais, estas iniciativas levan asociadas a creación ou mantemento de 36 postos de traballo.
Durante a súa intervención, Cividanes subliñou a importancia de que as ideas innovadoras dos emprendedores adecúen as súas propostas ás novas necesidades do mercado actual, nas que as demandas dos clientes e consumidores son máis personalizadas e especializadas, así como a aposta pola calidade dos produtos e servizos que ofrecen, a valorización dos recursos do territorio e a produción sostible.
Cividanes resaltou os instrumentos de apoio que ofrece o Goberno galego para facilitar a posta en marcha e a consolidación temperá dos proxectos dos emprendedores. Así, a través do Igape, poden acceder a programas como o Galicia Emprende, que ten como obxectivo estimular o tecido empresarial galego e fomentar a xeración de emprego mediante a creación e fortalecemento de novas pemes, así como os préstamos directos activados no programa de instrumentos financeiros innovadores (IFIs) para facilitar os seus investimentos.
Mediante a última convocatoria do programa Galicia Emprende, do que permanece aberto o prazo de solicitudes ata o vindeiro 10 de outubro, e do Galicia Rural Emprende, a Consellería de Economía, Emprego e Industria achegará en total axudas por valor de 9 millóns de euros a 200 proxectos de autónomos e emprendedores para mobilizar investimentos que superarán os 24 millóns de euros.
Nestes días están a finalizar tamén as accións de formación e asesoramento nos espazos coworking de Santiago de Compostela, A Costa da Morte, Ferrolterra, A Mariña lucense, A Ribeira Sacra, Ourense e Celanova-Terras da Limia, nos que no conxunto das actuais edicións se apoiaron 167 iniciativas de emprendemento. Desde o coemzo da súa actividade en 2016 ata 2018, as iniciativas impulsadas por esta rede de aceleradoras levan asociadas a creación e mantemento de 226 empresas e 394 postos de traballo.
