Santiago de Compostela, 17 de novembro de 2018.- Representantes do Igape e da Cámara de Comercio da Coruña presentaron en Santiago de Compostela a convocatoria para a participación conxunta de empresas galegas na Feira Expo Antad & Alimentaria que se celebrará en México en marzo de 2019.

No evento, referente principal para a industria da alimentación iberoamericana, Galicia disporá dun pavillón propio para a promoción do sector ao que, ademais das pemes interesadas, tamén acudirán a Asociación Nacional de Fabricantes de Conservas de Pescado e Marisco (Anfaco) e os Consellos Reguladores das D.O. Ribeiro e Rías Baixas.

A convocatoria de participación para as empresas, que estará aberta ata o 22 de novembro, formará parte do Plan de fomento das exportacións galegas (Foexga), que desenvolve a Consellería de Economía, Emprego e Industria e que financia o 90% dos custos da misión comercial. Con ela, preténdese reforzar a imaxe de Galicia e a presenza das pemes na feira e intensificar a posición dos produtos galegos no mercado mexicano, ademais de apoiar as compañías que están á procura de oportunidades comerciais no país centroamericano.

Nunha mesa redonda celebrada durante a xornada, os demais impulsores da iniciativa, Anfaco e os Consellos Reguladores das D.O. Ribeiro e Rías Baixas, expuxeron a relevancia do evento para o sector agroalimentario galego. Os participantes puideron coñecer tamén as experiencias de dúas empresas galegas nese mercado, así como diferentes aspectos relacionados coa loxística para a expedición dos produtos en México.

Un total de 94 empresas galegas do sector da alimentación e as bebidas venderon o pasado ano produtos por un valor de 17,6 millóns de euros a México, país que acadou o posto número trece no total das vendas galegas ao exterior, cun volume de exportacións que chegou aos 412 millóns de euros.

Desde 2014, preto de 700 empresas impulsaron co Foexga a súa proxección exterior participando en máis de 300 accións promocionais en máis de 45 países. Esta liña de axudas desenvólvese en colaboración coas cámaras de comercio galegas e complementa os demais servizos de apoio que se achegan a través do Igape, como o programa Galicia Exporta, e que forman parte das accións impulsadas no marco da Estratexia de Internacionalización da Empresa Galega 2020.