Santiago, 1 de setembro de 2014.- As pemes galegas que impulsen novos investimentos empresariais poden contar actualmente cos préstamos directos Jeremie, unha iniciativa coa que a consellería de Economía e Industria busca mobilizar 15 millóns de euros en apoio do tecido empresarial galego e, con el, da creación de emprego.
Os préstamos, xestionados a través do Igape, constitúen unha liña pioneira en Galicia que conta cunha dotación inicial, ampliable segundo a demanda, de 8 millóns de euros procedentes de fondos Feder. Con ese fondos, outorgaranse créditos de entre 70.000 e 1.050.000 euros, cos que se pode financiar ata o 70% dos proxectos.
Os prazos de amortización dos préstamos serán de ata 7 anos con un de carencia, e contarán cunha vantaxe clave para os empresarios e emprendedores galegos: uns xuros que poden ser inferiores a 1,3%. Trátase de xuros fixos vinculados ao euríbor, que se calcularán sumando ao euríbor a un ano vixente no momento da concesión, un tipo adicional que oscilará entre un 0,75% e un 3%, en función do importe do préstamo. As bonificacións de xuros previstas farán posible que os tipos efectivos resultantes poidan ser inferiores a ese 1,3%.
A través desta nova liña de financiamento apoiarase a pemes ou microempresas tanto para novas instalacións produtivas como para actuacións destinadas a ampliar, modernizar ou diversificar instalacións xa existentes. Ao abeiro destes apoios será posible financiar tanto activos fixos materiais asociados ó investimento –terreos, obra civil, adquisición de inmobles, bens de equipamento ou mobiliarios– como os activos intanxibles necesarios para desenvolver o proxecto, incluíndo aplicacións informáticas, propiedade intelectual e industrial, ou licencias de fabricación.
Os préstamos Jeremie constitúen unha das liñas máis destacables do programa de financiamento empresarial Galicia 1000, dotado con 50 millóns de euros e co que a Xunta apoiará 1.000 novos proxectos empresariais, mobilizando arredor de 200 millóns en investimentos e dando resposta axeitada ás distintas necesidades das empresas, en función da súa situación, procurando que ningún proxecto viable quede sen financiamento. O Galicia 1000 incorpora instrumentos como o capital risco, préstamos participativos, préstamos bancarios bonificados para investimentos, préstamos avalados e garantías para o financiamento de operacións de circulante.
