Ferrol, 14 de xuño de 2011.- O conselleiro de Economía e Industria e presidente do Igape, Javier Guerra, anunciou que "avanzar na promoción internacional do porto exterior de Ferrol para contribuír á captación de novos tráficos e grandes operadoras navieiras" é o obxectivo do convenio que asinou hoxe co presidente da Autoridade Portuaria de Ferrol-San Cibrao, Ángel M. del Real Abella.

Esta iniciativa enmárcase dentro das actuacións impulsadas ao amparo do Plan Ferrol para a dinamización económica das comarcas de Ferrol, Eume e Ortegal, que coordina a Consellería de Economía e Industria a través do Igape e onde o sector loxístico destaca como unha das actividades a desenvolver na zona, pola súa importancia para dinamizar a internacionalización do tecido produtivo das comarcas e para a captación de novos investimentos empresariais.

ImageNo marco deste plan promocional para 2011, o Igape achegará o 50% do financiamento das actividades previstas. Entre as accións para este ano, inclúense actividades promocionais en destinos internacionais como Singapur, Hong-Kong, Miami, Brasil, Alemaña, Holanda, Corea, Xapón, India, México ou Marrocos.

En total, incluíndo, as xornadas técnicas internacionais, prevese o desenvolvemento de máis dunha vintena de actividades orientadas á promoción exterior do sector loxístico ferrolán en xeral e, en concreto, do porto exterior de Ferrol.

Neste sentido, o conselleiro de Economía e Industria lembrou que, durante os dous últimos anos, desenvolvéronse ao abeiro deste convenio de colaboración máis dunha trintena de eventos promocionais internacionais que permitiron establecer interesantes relacións económicas orientadas á dinamización da actividade comercial do porto ferrolán e á captación de investimentos para as comarcas de Ferrol, Eume e Ortegal.

Por outra banda, Guerra sinalou que este exercicio considérase fundamental para o lanzamento definitivo do Porto Exterior de Ferrol, pola culminación e posta en servizo da segunda fase desta infraestrutura e a recente adxudicación da terminal de colectores.

O obxectivo é lograr que se estableza unha gran terminal de colectores de nivel internacional no Porto Exterior de Ferrol, o que será un fito de gran trascendencia que contribuirá de xeito fundamental ao crecemento da actividade económica e a xeración de emprego en Ferrol e as súas comarcas, e no resto de Galicia.