Santiago, 25 de abril de 2016.- O director do Igape, Javier Aguilera, salientou hoxe a cooperación como unha das claves para seguir avanzando na internacionalización do tecido empresarial galego e no crecemento das exportacións, que en 2015 pecharon cun novo récord histórico, 18.831 millóns de euros. Neste sentido, destacou que a evolución segue a ser positiva e as vendas ao exterior medraron un 7% nos dous primeiros meses deste ano con respecto ao mesmo período do ano anterior, por riba da media estatal.
Aguilera salientou que o traballo en colaboración –entre grupos de empresas, a través dos clusters e das asociacións empresariais, ou da man das cámaras de comercio–,coordinado pola Consellería de Economía, Emprego e Industria a través do Igape, ten contribuído ao bo comportamento do comercio exterior galego durante os últimos anos. Desde 2009, as exportacións de Galicia a Colombia e Rusia medraron nun 64% e nun 46%, respectivamente.
Un total de 229 empresas exportaron a Colombia durante o ano pasado, mentres que a Rusia exportaron 139. Ademais, o director do Igape destacou que quince empresas da comunidade, de ámbitos como a enxeñaría, a construción, as instalacións eléctricas ou os servizos, se implantaron comercialmente en Colombia ao abeiro de catro proxectos Primex baseados na cooperación e apoiados polo Igape.
O director do Igape considerou que precisamente a cooperación permite compartir riscos e estratexias e avanzar con maior rapidez e seguridade no ámbito internacional, ao tempo que fai posible que as empresas poidan contar con asesoramento e asistencia en destino, a través das plataformas da rede Pexga en colaboración coa CEG. Uns servizos que en encontros como o que comeza hoxe se facilita en orixe, para que as empresas poidan facer consultas ou encargos concretos con respecto aos mercados de Colombia e Rusia, engadiu.
O director do Igape destacou que a Consellería de Economía, Emprego e Industria, ademais de manter activos programas como Galicia 1000 ou Galicia Inviste para que as pemes conten cos apoios que precisen para investir e crear emprego, está a facer este ano un esforzo especial no ámbito da internacionalización, a través do programa Galicia Exporta, dotado con case 10 millóns de euros para apoiar a presenza das empresas en eventos expositivos internacionais ou para facilitar a contratación de xestores de internacionalización.O encontro coas plataformas Pexga en Colombia e Rusia inclúe entrevistas privadas a demanda das empresas interesadas e talleres sectoriais cos directores das oficinas que se desenvolverán en Santiago, Vigo, Lugo e Ourense.
