A Xunta de Galicia organiza o encontro OPORTUNIDADES INDUSTRIA 4.0 EN GALICIA, que se celebrará o martes 20 de marzo, a partir das 9.30 horas, na Cidade da Cultura (sala de convencións, edificio CINC P4), en Santiago de Compostela.
Na xornada presentaranse as conclusións do estudo que impulsou a Consellería de Economía, Emprego e Industria, a través do Igape e coa colaboración da Alianza Tecnolóxica Intersectorial de Galicia (ATIGA), para coñecer o nivel tecnolóxico actual das empresas galegas e o grao de implantación da Industria 4.0 e identificar as oportunidades de mellora, co obxectivo último de adecuar as políticas públicas ás necesidades detectadas.
Os sectores empresariais analizados foron a agrolimentación e bio, a madeira e o forestal, as enerxías renovables, as TIC, a automoción, os sectores naval, aeronáutico e metalmecánico, o téxtil e a moda, e a pedra natural.
